يوميات العم معروف الساخرة الحلقة التاسعة عروض نار

يوميات العم معروف الساخرة

بقلم وريشة: نضال البزم
(بِالعاميّة الأردنيّة) حلقة كل ثلاثة أيام تتناول حياة المواطن اليومية بطريقة ساخرة
بطلها "العم معروف" وزوجته "مرمر" وجاره المُقَرَب له "أبو النمر"..

الحلقة التاسعة
((عروض نار))
عروض ناااار.. اشتري (10) علب فول بدينارين واربح علبة مجانًا، كانت هذه العبارة التي قراءها العم معروف على بقالة صديق عمره "أبو النمر" فدخل مُسرعًا حتى يستفيد من هذا العرض قبل نفاذه..
- العم معروف: هتلك (11) علبة فول يا "بو النمر" وآخر الشهر الجاي بعطيك حقهم.
- أبو النمر: يا "عم معروف" دينك كِبر!
- العم معروف: خلص سكر ثمك ولا اتحملني جميلة، بكرة بعطيك إيّاهم كلهم دفعة وحدة..
- أبو النمر: كيف دفعة وحدة؟! بقولك المبغ كِبر.. عليك (25) دينار من وين بدك اتجيبهم؟ ولا واقع على كنز مثلاً؟!
- العم معروف: لا يا غبي، مرتي "مرمر" بدها تشتغل عند جارنا الأستاذ حامد سكرتيرة في المكتب وبراتب كويس وفي (أوفر تايم) كمان..
- وهنا طار عقل أبو النمر: شو بتقول ((اوفر تايم))؟! بدك اتشغل مرتك عند حامد ((اوفر تايم))؟! يا "عم معروف" سيبك من حامد هاظا إذا كان شغلها ضروري يعني، خليها اتدور عند غيره!!
- العم معروف: والله ضروري يا "بو النمر"، ما انت عارف راتب التقاعد يا دوب بكفّي لنص الشهر، وانا كبير بالعمر ما حدا بشغلني، وبعدين شو مال حامد؟!
- أبو النمر: حامد نسونجي، وكل يوم عنده سكرتيرة جديدة! وِليّ بِطَّول عنده بتكون مضطره ومجبورة، أو صايعة وبتوافقه على كل طلباته وحركاته، وبالآخر بس يزهق منها بحلِقلها وبنزل إعلان بدُّو غيرها.
- العم معروف بغضب شديد: طيب وين أهالي البنات عنه؟ أيّ والله لو حاول يقرب من "مرمر" لأكون طاخه 30 طلقة بمسدسي وبنص راسه كمان!!
- أبو النمر: لا تُعرط يا "عم معروف" المسدس بوخد (14 أو 7) طلقات بس!! المهم انت بتعرف، البنات بخافو من الفضايح عشان هيك لو سألتهم ليش تركتو الشغل بقولو: الشغل مُتعب، أو ما ارتحت لصاحب الشغل، أو الراتب ما بكفي للمواصلات، أو أي شي لأنها بتخاف تفضح حالها.. هذا هو مجتمعنا.. هيك بتعامل مع الأنثى والموظفة..
- العم معروف: والله إنك صديق العمر يا "بو النمر"، امنيح إليّ نصحتني، هسه بقولها دوري على شغل غيره..
- أبو النمر: طيب فهمها كمان إليّ بِطلبووو موظفات بموصفات خاصة يعني (فري) هذول هُمه جماعة حامد وأمثاله.
- العم معروف: أقولك والله ما بخليها تشتغل خلص تُقعد بالدار والله بِفرجها علينا، بلاش بكرة انبلي بواحد أزعر، ترى أنا عقلي خزق زيّ "مرمر".. كلو ولا الشرف يا "بو النمر" هاظا الوحيد إليّ باقيلنا في الدنيا.
- أبو النمر: الله يعين البنات على أصحاب العمل إليّ ما عندهم أخلاق ويستر عليهم يا رب.. أنا بنصح كل بنت لما اتشوف صاحب الشغل مثل حامد تتركه والرزق على ربنا.
- العم معروف: والنعم بالله.. بس مو كل أصحاب الشغل بهذه المواصفات السيئة يا "بو النمر"؟!
- أبو النمر: أنا ما قلت كلهم يا "عم معروف"، بس إليّ مثل حامد كثاااااار.
- العم معروف ينظر لساعته: طيب هات علب الفول خليني أروح.. إتأخرت على البيت، ما عندهم شي يتغدوه!
- أبو النمر: هيك بصير عليك (27) دينار يا "عم معروف".
- العم معروف: ولا أقولك.. هات بس علبة فول وحدة بتكفي، بلا عروض نااار.. بلا وظايف.. وبلا هيك عيشة صارت زي الزفت. — ‏مع ‏نضال البزم‏.‏

تابعونا  بكل  جديد على صفحتنا  على الفيس بوك لايك وشير

https://www.facebook.com/datingarabs


المصدر اصلاح جو