يوميات العم معروف الساخرة الحلقة العاشرة مصانع تدوير متنقلة

يوميات العم معروف الساخرة

بقلم وريشة: نضال البزم
(بِالعاميّة الأردنيّة) حلقة كل ثلاثة أيام تتناول حياة المواطن اليومية بطريقة ساخرة
بطلها "العم معروف" وزوجته "مرمر" وجاره المُقَرَب له "أبو النمر"..

الحلقة العاشرة
((مصانع تدوير متنقلة))
يالله يا بطاطا.. يالله يا بندورة.. يالله يا خياااار.. وفجأة يعلو المكان صوت موسيقى (بِكب) الغاز، وبعد بِعدّة دقائق يعلو صوت يُنادي: (إليّ عندو غسالات خربانه.. إليّ عندو حديد.. إلى عندو خُرده للبيييييييييع)!! هذه الأصوات التي تَجهَر بها مُكبرات (البِكبات) المُتتالية التي يبحث أصحابها عن الرزق جعلت "العم معروف" يستيقظ من نومه يشتم بألفاظه السيئة، مثل العادة لا يُراعي حرمة بيته ولا أطفاله كحال ((الكثيريييييين))..
- العم معروف: وبعدين معهم هظول البيّاعيين؟! الواحد مو عارف ينام، (الله يلعن هيك هيك، لهيك هيك)، كيف بدنا نِخلص منهم؟!
- مرمر: يا "معروف" حرام عليك هدول عندهم اولاد وعيَل بدهم يربوهُم، مانت شايف الحياة ما أصعبها!!
- العم معروف: يا "مرمر" ما بِلحَق يروح تاع الخُضرة إلا بنطلنا تاع الخُردة، وما بِلحَق يروح تاع الخُردة إلا بِنط تاع الغاز.
- مرمر مُقاطِعة حديثه: على سيرة تاع الخُردة امبارح اخلِصت من الغسالة إليّ كانت ماخده الحيّز بِالحمّام..
- العم معروف: إن شالله الغسالة القديمة إليّ كنت بدي أعطيها لبيت اختي حتى يسلّكو عليها؟
- مرمر: آه هي اخلصت منها.
- العم معروف: وأكيد ضِحك عليكِ تاع الخُردة ودفعلك (10) دنانير مثل ما بِضحكو على الناس وباخدو منهم أشياء ثمينة بِتراب المصاري.
- مرمر: لا.. بالأول ما رضي ياخُدها وقال هاي قديمة، فقُمت أنا قلتلو: خُدها ببلاش إذا بدك إيّاها، قلي: لا.. بتدفعي (3) دنانير بدل اعتاله!
- كان العم معروف ينظر لها وقد بدأ مؤشر غضبه يرتفع فصرخ بوجهها: وبعدين شو صار شوقتيني أعرف النهاية؟
- مرمر: لا اطلعت أنا أشطر مِنّو.
- العم معروف: يعني حَلقتيلو وما أعطيتيه الغسالة؟ ترى هظول تجار الخُردة المتنقلين راس مال الواحد منهم خمس دنانير ، وبعمَل ضجة كبيرة! وبدو يشتري فيهم نص عمّان!
- مرمر: لا أعطيتو إيّاها، بس ما أعطيتو (3) دنانير، وقلتلو: بعطيك دينارين بس.. بعدين أخدها وريحني منها.
- العم معروف بغضب: الله لا يعطيك العافية! وَلك الغسالة شغاله ما مالها شي!! وكمان بتعطيه دينارين؟! وَلك أنا رفضت ابيعها بـ (15) دينار "لأبو النمر"، لأني بدي أعطيها لأختي.. أي والله لأرفش ببطنك..
وتهرب "مرمر" من زوجها "العم معروف" الذي قام يركض خلفها بسرعة الريح العاصف، وفجأة يَطرق باب بيتهم وينادي عليه صديق عمره..
- أبو النمر: يا "عم معروف" تعال عشان اتوصلني بطريقك على الدكان إذا جاهز.
- العم معروف بعصبية: لا أنا تفصيل مو جاهز.. روح حل عني يا "بو النمر" عندي شغل مو فاضيلك اليوم..
- وبعد ربع ساعة من المُطاردة بين الغُرف، استطاع "العم معروف" أن يقبض على زوجته.. وطبعًا الله لا يُحطكُم مكانها!! "العم معروف" رغم بعض الإصابات التي تعرض لها منها وهي تُدافع عن نفسها فهو الآن بالسجن بسبب دعوى رفعت عليه لحماية الأسرى من زوجته "مرمر" التي ما زالت ترقد على سرير الشفاء بسبب مصانع التدوير المتنقلة عفوًا أقصد بسبب (البِكبات) التي تشتري الخُردة. — ‏مع ‏نضال البزم‏.‏

تابعونا  بكل  جديد على صفحتنا  على الفيس بوك لايك وشير

https://www.facebook.com/datingarabs