يوميات العم معروف الساخرة الحلقة الثامنة قرّب الفَرَج

يوميات العم معروف الساخرة

بقلم وريشة: نضال البزم
(بِالعاميّة الأردنيّة) حلقة كل ثلاثة أيام تتناول حياة المواطن اليومية بطريقة ساخرة
بطلها "العم معروف" وزوجته "مرمر" وجاره المُقَرَب له "أبو النمر"..

الحلقة الثامنة
((قرّب الفَرَج))
دخل "العم معروف" بيته وهو سيعدٌ جدًّا.. بل كان يبدو عليه وكأنه فراشة تطير بين الحقول، نظرت له زوجته "مرمر" مُستغربه ما حلّ به بعد أن كان (منكِد عليهم عيشتهم لأيام مضت)!
- مرمر: خير شو مالك؟ إليّ بشوفك بقول عنك عصفور وطاير؟!
- العم معروف: فرحان.. فرحان يا حبيبتي "مرمر" فرحااااان..
- مرمر تتحدث بصوت خافت: حبَك بُرص إن شالله، يلتفت لها "العم معروف" قائلاً: شومالك وَلِه؟ شو بتحكي بصوتك الواطي يا واطيه؟
- مرمر: ما بحكي شي.. بقول الله يديم عليك السعادة.. خير يا طير شو قصتك؟ ليش هيك فرحان زي إليّ وارث مبلغ كبير؟!
- العم معروف: وَلِك يا هبله، بتقدري اتقولي إني ورثت من الحكومة!!
- مرمر بتعجب: ليش الحكومة ماتت؟!!
- معروف: الله يسمع منك.. قصدي تِفي من ثُمك.. بعيد الشر عنها، وَلِك يا تيسه، الحكومة بدها تصرف الدفعة الثالثة من الدعم أخر هاظا الشهر..
- مرمر بفرح كبير: والله بتحكي جد؟! طيب دقيقة يا "معروف" هيني راجعة، تدخل إلى غرفتها وتُحضر ورقة كبيرة وتفتحها.
- العم معروف: شو هاظا الرول؟!
- مرمر تبدأ بقراءة ما في الورقة، أو الرول على رأي "العم معروف": بيض كرتونتين.. لحم خروف فخدة كاملة + كتف امقَطَع للطبيخ، مِش مشكلة لو كان مثّلج.. شوال رز+ شوال سُكر.. تنكة زيت للقلي ومِش مشكلة لو كان زيت صويا.. اكمن بوكيت جبنة مثلثات + مرتديلا + أكمِن جاجِة مثلجة، وكمان بِدنا... لكن يُقاطعها "العم معروف": هيييّ (ستوب) يعني وقفي! شو هاظا إليّ بتخبصيه؟! ليكون بتفكري الحكومة بدها تصرف علينا وهي إليّ عايشة من خيرنا..
- مرمر: هَظول أغراض ناقصيّنّا يا "معروف"!! ومن أشهر ما دخلت دارنا.. من أيام الدفعة الثانية ما اشترينا مونة، وعلى إيدك إمقضينها خبز وقلاية بندورة.. ولما غليت البندورة قاطعناها وقضّيناها نوكل خيار وخبز، ولما رجع غِليّ الخيار قاطعناه وقضّيناها نوكل بطاطا مسلوقة، ولما غليت البطاطا قاطعناها وارجعنا نوكل بندورة ولما .... "العم معروف" يُقاطعها من جديد:
- الله يقطع خبرك يا رب! وَلِك بتحمليني اجميلة؟! وَلِك مو أنا لحالي عايش هيك.. هاااظ حال (3 أرباع) سكان الأردن، ولما الحكومة بتتأخر بتشحيدنا الدعم ما بقدر أجيبلكم رفاهية زي البيض والمرتديلا والجبنة واللحمة والجاج والفواكة بأنواعها! يا دوب الراتب يكَفّي أجار بيت وكهربا وميّ وشوية بنزين للسيارة.
- مرمر: طيب ونِفرض إنّو الحكومة قطعت الدعم كيف بدنا نوكل بيض ومعلبات فول؟ مع إنوّ الدعم بصرفوه كل أربع شهور، بس بِتفِش الريق.
- العم معروف: شوفي أقولك إيّاها من الآخر، بما إنّو الحكومة أخرت الدفعة من شهر (7 لشهر9) شكلها بِتفحص نبض الشارع، وبما إنّو الناس ولا عبالهُم، بَبَشرك، ربما تكون هاذي آخر دفعة، يعني (سلامتِك مَحلا بِجامتِكْ)..
- مرمر تبدأ تصرخ وتلطم وجهها: يا ويلي.. يا ويلي، يعني رح انموت من الجوع إذا وقفت الحكومة الدعم؟!!
- العم معروف: وَلِك ما بتموتي، مَهو الدعم واقف أصلاً، يعني إشوية النيرات هذول إليّ بَنطونا إيّاهُم شو بدهم يجيبو؟ ما كل شي غالي والأسعار نار.. يعني إليّ بَعطونا إيّاه حكومتنا باليمين بوخذو بِالشمال..
- مرمر: كيف يعني؟
- نظر لها العم معروف بغضب قائلاً: يعني سكري ثُمك لأنك فريتي قلبي، والله إنِك ما بتفرقي عن الحكومة بشي..
- مرمر وكأنها تلقت صفعة قوية وَشتيمة عالية السقف: أنا ما بفرق عن الحومة؟!! ليش أنا طول انهاري إيدي بجيبتك وبنهبها يعني؟! — ‏مع ‏نضال البزم‏.‏

تابعونا  بكل  جديد على صفحتنا  على الفيس بوك لايك وشير

https://www.facebook.com/datingarabs

المصدر اصلاح جو