يوميات العم معروف الساخرة الحلقة الخامسة المنافقون

يوميات العم معروف الساخرة

بقلم وريشة: نضال البزم
(بِالعاميّة) حلقة كل ثلاثة أيام تتناول حياة المواطن اليومية بطريقة ساخرة
بطلها "العم معروف" وزوجته "مرمر" وجاره المقرب له "أبو النمر"..

الحلقة الخامسة
((المنافقون))
بعد أن تمت الموافقة على "العم معروف" من قبل المختصين لخوض الانتخابات البلدية، قام بتعين صديق عمره أبو النمر ليكون مدير حملته الإعلانية كنوع من (البرُستيج)، ولأنّ أبو النمر صاحب بقالة وجميع أهلي المنطقة يعرفونه ويتمنون رضاه لكي يوافق على إعطاءهم كل ما يحتاجونه من بقالته بالدَين..
- العم معروف يقف في الشارع ليُتابع ما قام به "أبو النمر" من تعليق للإعلانات وهو يهز برأسه سعيدًا بما يراه من همة ونشاط لمدير حملته الإعلانية ويقول له مادحًا: الله ينطيك العافية يا أبو النمر، كفو*.. كفو يالحبيب.
- أبو النمر: على رأسي والله "العم معروف"، بس يا ريت يتمِر معك إذا نجحت وما تنسى صاحبك ورفيق عمرك أبو النمر..
- العم معروف: إخص عليك يا "بو النمر"، هو أنا عمري قصرت معك؟! ولك يا مصدي واحنا اصغار كنت أنطيك* كل أكمن يوم (شلن) ولا نسيت إني كنت أصرف عليك أكثر من أبوك؟
- أبو النمر: لا ما انسيت يا عم معروف، وما كنت تنطيني (الشلن) لله يعني!! كنت أحملك الشنتة واحنا رايحين وراجعين من المدرسة لباب البيت، ودايمًا أكذب واشهد معك قدام أبوك إنك شاطر ومجتهد، وانت كنت على السكين يا بطيخ*..
- العم معروف بغضب: خلص سكر ثمك.. هسع* بدي أصير مسؤول كبير في البلدية، وحسك عينك تجيب سيرة أيام كنا صغار، فاهم ولا أبو النمر؟
- أبو النمر: فاهم.. فاهم يا عم معروف، هسه روح حضر حالك عشان اجتماع الأهالي بالمقر الانتخابي، وانا رح اقرا عليهم برنامجك الاصلاحي إلهم وللمنطقة..
- العم معروف: شو كتبت؟ هات تشوف..
- أبو النمر: شو بدي أكتب يعني غير الكذب إلي انتَ حكيتو مثل: إنك بدك تخدم المنطقة بإخلاص، ونك ما رشحت حالك إلا عشان خدمة الأهالي، ووعدك إلهم بفتح مدارس حكومية كبيرة، وإصلاح الشوراع المكسرة، وإنشاء صحيّة كبيرة، ونظافة الأحياء من الزباله ومياه المجاري إليّ طول انهارها فايضة، بالشوارع وتحويل منطقتنا الشعبية وكأنها من مناطق عمّان الغربية، وتعهدك إلهم بأنه الكهربا والمي ما تنقطع بالمرة.
- العم معروف: لا تنسى بالمقدمة إنك تشهدلي بأني رجل صالح وبخاف من ربنا كثير، وما بقطع ولا فرض صلاة، وبقضيها معك بالمسجد.. واهم شي اتوزع عليهم كنافة*.. ترى طعمي الثم بتستحي العين هههههه.
- أبو النمر: لا ما نسيت، انتَ غايب والله حاضر.. أنا وراك بمدح فيك كثير وطول نهاري مقضيها أكذب على الناس.
- العم معروف: ولا أبو النمر، ناسي قديش لهفت مني حتى اتقود الحملة الانتخابيه تبعتي؟!
- أبو النمر: لا مو ناسي طبعًا، أنا بتعب كثير عشان اتفوز بركي صرلنا ظهر نستند عليه..
- العم معروف: أبشر.. أبشر يا بو النمر.
وبعد أن فاز "العم معروف" قرر أبو النمر أن يذهب له للمرة (25) لمقابلته التي لم تتم بعد، وعندما طرق باب بيته خرج له ابنه فرهود وقال له قبل أن يسأله:
- فرهود: أبوي مو هون* يا عمي أبو النمر.
- أبو النمر: ولك هي سيارته واقفه برا؟!
- فرهود مرتبك: آه ماهو راح كزدره* يتطمن على أحوال المنطقة والناس.
- أبو النمر: طيب ليش ما برد على التلفون؟
- فرهود: لأنه عامله (صايلنت، يعني صامت.. أو بكون مضيّعه، أو بكون بالحمام، أو مشغول بمشاكل الناس، ويمكن يكون نايم، وربما إنّو مشغول مع أمي!!
أبو النمر بغضب: طيب قول لأبوك الناس داقة بي أنا، لإنّو حضرته ما برد على حدى بالتلفون، ولهسع ما نفذ أي شي من وعده إلهم، وانا إليّ بوجهم وكل تطعيمهُم* ومسابتاهم أنا إليّ باكلها لحالي!!
معناي كلمات:
*كفو يعني: قدها واقدود. *أنطيك يعني: أعطيك. *على السكين يا بطيخ يعني: تيس بالمدرسة. *هسع يعني: هلأ أو الآن. *كنافة يعني: حلويات نابلسية. *هو يعني: هنا. *كزدرة يعني: مشي على الرجلين. *تطعيمهُم يعني: مسبات من الزنار وتحت.


تابعونا  بكل  جديد على صفحتنا  على الفيس بوك لايك وشير

https://www.facebook.com/datingarabs