يوميات العم معروف الساخرة الحلقة الرابعة يا مال الشام يالله يا مالي

يوميات العم معروف الساخرة

بقلم وريشة: نضال البزم
(بِالعاميّة) حلقة كل ثلاثة أيام تتناول حياة المواطن اليومية بطريقة ساخرة
بطلها "العم معروف" وزوجته "مرمر" وجاره المقرب له "أبو النمر"..

الحلقة الرابعة
((يا مال الشام يالله يا مالي))
دخل "العم معروف" إلى دكان صديقه "أبو النمر" وصدفه قد علق ورقة كتب عليها (مطلوب موظف سوري بدون خبرة)، تفائل العم معروف كثيرًا لأنّه أخيرًا وجد لابنه "فرهود" وظيفة ((تظبه من الشارع))، وبنفس الوقت يأخذ راتب ويساعدهُ بهِ في مصروف البيت، فدخل "العم معروف" فرحًا وبثقة كبيرة قال:
- مرحبا ولا أبو النمر.
- أبو النمر: هلا، هلا والله بالعم معروف، بتعرف إنك ابن حرام.. عفوًا عفوًا قصدي ابن حلال.
- العم معروف: خير، كاين جايب سيرتي مع مين؟
- أبو النمر: مع حالي يا غالي.. كنت أفكر أجي عندك، لأني زمان ما شُفتك وشتقتلك..
- العم معروف: ولك لسه الفجر صلينا مع بعض جماعة بالمسجد، كيف زمان ما شفتني؟!
- أبو النمر: قصدي أجي أسهر عند بحوش الدار يا عم معروف واشربلي فنجان قهوة وكاسة شاي..
- العم معروف: مانت امبارح أجيت! وعلى كل حال تعال، بتنور يا بو النمر.. المهم بدي أبعتلك ابني "فرهود" اتشغله عندك بالدكان وتنطيه راتب كويس.. لأنه ترك شغلة من عند خضر بياع الخضرة قبل اسبوع؟
- أبو النمر يتفاجأ سائلاً: وليش ابنك "فرهود" سوري يا عم معروف؟!
- العم معروف بغضب: وليش الموظف السوري بفهم أكثر من ابني "فرهود" بالبيع يا بو النمر؟! ولا خلص بدك اتصير مثل غيرك اتشغل اخوانا السوريين واطّنِش ابن البلد المسكين العاطل عن العمل؟!
- أبو النمر: يا عم معروف افهمني، الموظف السوري بِرضى بأي راتب، وبتقدر تُحرُث عليه كثير واتشغله ساعات طويلة، أما ابن البلد نمرود وروحوه بِخشوموه*..
- العم معروف: ولك بتقول عن ابني "فرهود" نمرود، أيّ والله لو إنك مو صاحبي لرفشت ببطنك، لأنك أنت ما عندك وطنية وما بتحب أبناء وطنك..
- أبو النمر: خليني ساكت يا عم معروف، ولا انسيت شو اعملت انتَ بالأرملة "أم محمد" لما طلبت منها اتسلمك الدار بالخاوة* وترحل بِحجة إنك بدك اتجوز ابنك الحمار "عبود"، وقمت أجرتها بـ (350) دينار لعيلة سورية، والمساكين عشان يقدرو يأمنولك المبلغ الكبير بالغرفتين المعفنات والمرطبات، جابو اصحابهم وقرايبهُم وسكنو (3) عيَّل مع بعض، وقلبوو دارك لمخيم الزعتري!!
- العم معروف وقد عَلت عنده وتيرة التوتر: وَلك أنا شِفِقِت عليهُم وحبيت أوقف معهم.
- أبو النمر بعصبية: آآآه صحيح بصدق إنك حبيت توقف معهم!! كبير.. كبير يا عم معروف.. صحيح مصايب قوم عند قوم فوايد!!
- يخرج العم معروف من دكان أبو النمر والشرار يتناثر من عينيه ويدعي عليه: حسبي الله ونعم الوكيل فيك يا بو النمر سميت بدني الله يسُم بدنك.

*خشومة يعني (أنفه أو مناخيره).
* بالخاوة يعني (غصب عنها).

تابعونا  بكل  جديد على صفحتنا  على الفيس بوك لايك وشير

https://www.facebook.com/datingarabs


المصدر اصلاح جو