يوميات العم معروف الساخرة الحلقة السادسة تحذير + 18 واسطة طبية

يوميات العم معروف الساخرة

بقلم وريشة: نضال البزم
(بِالعاميّة) حلقة كل ثلاثة أيام تتناول حياة المواطن اليومية بطريقة ساخرة
بطلها "العم معروف" وزوجته "مرمر" وجاره المقرب له "أبو النمر"..

الحلقة السادسة تحذير (+ 18)!!
((واسطة طبية))
استيقظ "العم معروف" مذعورًا من نومه هو وزوجته "مرمر" على صوت طرقات باب بيته بشدّة، فهرع وحمل مسدسه واقترب من الباب الذي ما زال يُطرق، بينما "مرمر" تقف خلف باب غرفت نومها مرعوبة!!
- العم معروف: مين.. مين إليّ بدق الباب بهذه الساعة من الليل؟!
- أبو النمر برتباك شديد: أنا.. أنا يا عم معروف، مرتي "غزالة" بدّها تولد ويا ريت تيجي معي نوخذها بسيارتك على المستشفى..
- فتح العم معروف الباب وقال لأبو النمر: روح حضّرها هيني جاي أنا والمَرَة معك.. وذهب أبو النمر (زيّ الطيارة)..
- نظر العم معروف لزوجته "مرمر" وقال لها: روحي يا مَرَة حضري حالك خلينا نوخذ "أم النمر" على الغابة.. قصدي على المستشفى تنشوف هالمرَّة شو بدها اتخلِفلنا غير (التايجر) إليّ بيرفع الراس هه!!
- ركبوا جميعًا في السيارة وسط صرخات "أم النمر" فقال لها أبو النمر: سكري ثمك واخرسي يا "غزالة" فضحتينا..
- العم معروف: أي مستشفى بدك اتروح يا "بو النمر"؟
- أبو النمر: على أي مستشفى حكومي.. وذهب بهم "العم معروف" إلى أقرب مستشفى حكومي، وفورًا إلى قسم الولادة، وهناك لم يكن الطبيب المناوب موجودًا (زي العادة يعني)!!
- العم معروف للممرض النَعِس: وين الطبيب؟ وين راح ليش طول؟!! المَرَة بدها تولد..
- الممرض بعصبية: طوّل بالك يا عمي الحج.. الطبيب عندو حالة ولادة مستعصية، وإذا مستعجل روح على مستشفى خاص..
- أبو النمر: لا الله يستر عرضك خيووو*، والله الوضع على الله.
- العم معروف موجه كلامه "لأبو النمر": ولك هو في حدا بِخلِّف بهذا الوقت؟! ما بكفيك عندك "نمر" و"فهد" ويا دوب قادر اتطاعميهُم!!
- أبو النمر: بلغلط.. بلغلط يا "عم معروف" والله ما كان قصدي.. بعدين الرزق على الله، وبالمرَّة قُلت بركي إجت الهُم أخت..
- العم معروف للممرض: وَلك وين الطبيب؟ المَرَة في مراحلها الأخيرة.
- الممرض: لا تصرخ .. دقيقة هسه بيجي الدنيا مو طايرة.
- العم معروف: وَلك إلك نص ساعة بتقولي دقيقة.. وفجأة يخرج الطبيب المناوب من الغرفة المجاوة وهو يتثائب ويتجبّد من شدّة النَعس..
- الطبيب: وين المَرَة إليّ بِدها تولد؟
- أبو النمر: هيّها يا دكتور، إلحقنا الله يخليك.
- الطبيب: وين كانت اتراجع من قبل؟
- أم النمر: ما كُنت أراجع عند حدا.. كانت تشرف عليّ جارتنا الداية "أم محمد" إذا بتعرفها؟
- الطبيب: أنا آسف ما بقدر استقبلك، لأنك مو مسجلة عنّا من الأساس!
- أبو النمر: يا دكتور أرجوك، وين أروح بيها بنص الليل؟!
- الطبيب يُدير ظهره ويتركهُم: روح على مستشفى خاص، ممنوع وصعب استقبلها، ثم يعود لغرفته ليكمل نومه.
- العم معروف يحاول أن يُمسك بالطبيب ويقول له بعصبية: يا دكتور هذه حالة إنسانية، وهي مواطنة زي ما إنت مواطن!! لكن يُمسكه موظفوا الأمن..
- أبو النمر: والحل يا عم معروف، ((إلمَيّ)) بلشت تنزل!
- العم معروف: ولك إحنا بفصل الصيف أي مَيّ هاذي؟! هسع بحكيلك تلفون مع ابن صديقي وبدخلها غصب عنه..
وبعد تلفون العم معروف ما هي إلا دقائق حتى يخرج ممرضات ويأخذون "أم النمر" إلى الداخل لإجراء الولادة.
- أبو النمر: الله عليك يا عم معروف!! شو بشتغل ابن صاحبك؟ شكلو منصبه مهم وكبير!!
- العم معروف: وَلك هذا خميس الأهبل ابن جارنا أبو زكي عامل التنظيفات إليّ بشتغل بالمستشفى!!
وطبعًا أعزائي القراء ولدت أم النمر بالسلامة والفضل لخميس إليّ كان يشتغل عامل تنظيفات وأستطاع أن يمون* على الأطباء ويغير قانون الممنوع والصعب (بس ليش وكيف الله أعلم)..

معاني كلمات:
*خيووو يعني أخوي
*يمون يعني: إلوّ عليهم، وكلامه أمر مُطاع، شِكلو ماسك شي عليهم، والله أعلم!!


تابعونا  بكل  جديد على صفحتنا  على الفيس بوك لايك وشير

https://www.facebook.com/datingarabs


المصدر اصلاح جو