يوميات العم معروف الساخرة الحلقة الأولى بكرة العيد وبنعيد

يوميات العم معروف الساخرة الحلقة الأولى بكرة العيد وبنعيد

يوميات العم معروف الساخرة
بقلم وريشة: نضال البزم
حلقة كل ثلاثة أيام تتناول حياة المواطن اليومية بطريقة ساخرة
بطلها العم معروف وجارة المقرب له أبو النمر..


الحلقة الأولى
بكرة العيد وبنعيد
العم معروف يجلس مع أبو النمر في جلسة مسائية رمضانية، وقد كانت الجلسة جميلة في أواخر أيام رمضان الكريم مع حبات القطايف لولا أن رمى أبو النمر فُتيشة هزت كيان العم معروف مُحوّلا الجلسة لجلسة حامية الوطيس..
- العم معروف: ما بلاقيش معك فراطة 3 نيرات يا أبو النمر؟ إتكون كلها اربعاع وانصاص؟
- أبو النمر: لويش بدك الفراطة وقدامك كيس مليان؟! شو بدك بيهم؟!!
- العم معروف: ولك يا هبيلة.. بدي أعيِّد الاولاد والبنات، ولا انسيت إنو العيد قرَب؟
- أبو النمر: لا ما انسيت يا عم معروف، بس هو ظل واحد بعَيِّد ارباع وانصاص؟! أي عليم الله ممكن الولد يرميها بوجهك!! هو الربع ولا النص شو بدو يجبله؟ إذا ابني فهد رفع سعر المرجوحة إلي بعملها كل سنة على العيد تماشيًا مع أوضاع الغلا.
- العم معروف متفاجئ: شو بتقول يا ابو النمر؟!! ليش قديش صار الشوط على مرجوحة فهد الهبيلة؟
- ابو النمر: بــ 15 قرش 10 اشواط رايح جاي.. هيك أنا اعملت التسعيرة.
- العم معروف وقد بدأ يتوتر كعادته: حسبي الله ونعم الوكيل فيك انت وابنك يا ابو النمر! ولكم انتو من أي غابة جايين؟! بدكم تضحكو على الاولاد الصغار وتستغلوهم؟! ليش المرجوحة بشتغل على البنزين ولا على الكهربا؟ هظا إذا حجتك انتَ والهبيلة تبعك الغلا إلي سببه دولته!!
- يا عم معروف فهد ابني بشتغل على البيض!! مو على البنزين ولا على الكهربا!!
- العم معروف وقد فهم الموضع غلط: شو قصدك وًلا ابو النمر؟!!
- أبو النمر: يا عم معروف كرتونة البيض 3.5 دينار، وابني فهد بحب البيض كثير، الله وكليك ما بلحق أجيب كرتونة البيض حتى ببلش فيها مرة سلِق ومرة قلي، وخلال يومين بكون شطبها!! فقمت أنا قلتلو: ارفع سعر المرجوحة وبالأرباح بتجيب فيهم كلهم بيض.
- العم معروف بغضب: وطبعًا المواطن بدو يدفعلك إلك وللغضيب فهد فرقية سعر البيض..
- أبو النمر: أي يا عم معروف شاطر ادُقْ في أنا!! روح دُق بالنسور إلي نازل فينا رفع، مرة ضريبة على الكلام! ومرة رفع الكهربا! ولا البنزين بنزل سعره بالعالم بقوم دولته برفعه عنا!! احنا هيك بس شاطرين اندق ببعض بس!!
- العم معروف: والله أنا بقول إنوّ المواطن ما لازم يعرِّف الدكتور النسور بأهم احتياجاته حتى ما يرفع سعرها وخصوصًا الهوى إلي بنتنفسه خوف ما يرَّكِبلنا عدادات ويحسبنا على اللتر.
- أبو النمر: بالك بعملها؟
- العم معروف: هه قال بعملها، إي أنا متأكد إنو بعمل أبوها، لأنو النسور أقوى رئيس وزراء أردني برفع الأسعار.. ولا بهمه مواطن ولا حتى نايب، ولا حتى فارقه معه شو رح يصير!
- أبو النمر: طيب هي صوت آذان العشا قوم تنصلي التراويح وندعي ربنا يخفف عنا الأسعار ويخلصنا من الغلا يا رب.
- العم معروف: إييي والله يخلصنا من الغلا.. هو احنا في عِنا أغلى من دولته؟


المصدر اصلاح جو