يوميات العم معروف الساخرة الحلقة الثانية عشر حجًا مبرورًا

يوميات العم معروف الساخرة

بقلم وريشة: نضال البزم
(بِالعاميّة الأردنيّة) حلقة كل ثلاثة أيام تتناول حياة المواطن اليومية بطريقة ساخرة
بطلها "العم معروف" وزوجته "مرمر" وجاره المُقَرَب له "أبو النمر"..

الحلقة (12)
((حجًا مبرورًا))
كانت صاعقة وقعت على مَسمَع "العم معروف" عندما عَلِم من أخبار التلفزيون الأردني الساعة الثامنة مساءًا بأنّ الحُجّاج الذين يجب أن يُرجعوا وزارة الأوقاف هُم من مواليد (1943) فما دون، وأعمارهم (70) سنة أو أكثر.
- العم معروف بغضب: لا حول ولا قوة إلا بالله شو إليّ قاعد يصير؟ وهَذي السنة كمان ما رَح أحِج!! ويحمل تلفونه ويطلب صديقه "أبو النمر": ألو أبو النمر تعال اسهر معي، والله إني بدي افقع إذا ما حكيت مع حَدا وفشيت غُلي..
- أبو النمر: والله إنك ابن حلال يا "عم معروف".. أنا على باب دارك افتحلي..
- العم معروف: وَلك يا غبي لويش ما سَكَرت عليّ الخط بما إنّك قريب؟ بتظلك طول عُمرك ما بتفهم وتيس! لازم يعني اتخسرني مكالمة؟!!
- مرمر: روح يا "فرهود" افتح الباب "لابو النمر".. خلي أبوك يفش غُله معه، وأنا خليني أروح أحضر المسلسل التركي.
- بعد أن يدخل "أبو النمر" ويجلس: خير شو مالك (امهَسهِسة) معك؟!
- العم معروف: ما طلعلي حَج هذه السنة كمان!
- أبو النمر: بتستاهل لأنّك ما سجلت بصندوق الحَج إليّ نصحتك فيه..
- العم معروف: رُحت أسجل قالولي: إليّ بتنطبق عليه الشروط لازم يكون رصيده أقل شي (3000) دينار.. وأنا يا دوب اقدِرت أحوِّش شوية قروش عشان أطلع أحج فيهم.
- أبو النمر: وشو بدك اتسوي؟!
- العم معروف: بدي أشكي بثي وحزني لله رب العالمين.. وَلك يا "بو النمر" أنا خايف أموت قبل ما أحِج، مانت عارف عليّ بلاوي ورشاوي.. بدي أروح أنظِفها وأبدا حياة جديدة..
- يضحك أبو النمر: هههههههههه، طيب واليّ عمره (70) سنة مثل ما طلبو وزارة الأوقاف هو لهسع مثلك مو تايب وعليه بلاوي زرقا وطالع يبيّض صفحته؟!
- العم معروف: سكر ثمك ولا تضحك.. ترى مولعة معي!!
- أبو النمر: على الحساب إنتَ بتعرف ناس كبار بالحكومة وإلك واسطات ومعارف.. خليهم يزبطوك بِالحَج.. بركي اخلصنا من القلق والضجة إليّ بتعملها كل سنة لما وزارة الأوقاف يحلِقولك.
- العم معروف مُرتبك: وَلك بعرف، بس ما بَحِب أدخِلهُم بهيك أمور لأنها تُعتبر فساد وأنا بدي أحِج طبيعي!!
- أبو النمر مستغرب: ليش في حج طبيعي وفي اصطناعي يا "عم معروف"؟!
- العم معروف: طبعًا يا أهبل.. الطبيعي إنّو الحج يُزبط معك على البركة، أما الاصطناعي مثل: الواسطة.. أو إنك مسجل بالصندوق إليّ والله أنا مو عارف شو قِصته!.. "أبو النمر" العبادة صارت للأغنياء فقط.. إليّ معاه مصاري بِحِج واليّ ما معه الله يجعله ما حَج، وكمان بِروح على النار.
- أبو النمر: خلص استنى دورك بتروح اتحِج طبيعي.. مع إني كنت بدي أحكيلك مع معالي وزير الأوقاف أخليه يزَبْطَك وتطلع..
- العم معروف (يُجَلِس قعدته): بِجَد يا خوي يا "بو النمر" بتعرف معاليه؟!
- أبو النمر: آه طبعًا ولا بتفكر حالك بس إنتَ بتعرف ناس مُهمين.. أصلاً هو ازبون عندي بالدكان وكثير بعطية أغراض بالدين.
- العم معروف بلهفة: أخوي "أبو النمر" شوفلي معاليه بركي اطلعت أحِج.. والله ضميري بأنبني وبدي أبيِِّض صفحتي..
- أبو النمر بثقه: قبل شوي كنت اتقولي أهبل وتيس هسه أخوك؟!! وبعدين إنتَ بِتحِب اتحِج طبيعي ما بتحِب اتحِج اصطناعي!
وطبعًا "العم معروف" راحت عليه كمان هذه السنة لأنهُم الجماعة بدهُم إليّ أعمارهم (70) سنة أو أكثر، بس كيف بِدهُم ياخدوهُم.. يمكن على نقالات مثلا، الله أعلم.. — ‏مع ‏نضال البزم‏.‏

تابعونا  بكل  جديد على صفحتنا  على الفيس بوك لايك وشير

https://www.facebook.com/datingarabs


المصدر اصلاح جو