يوميات العم معروف الساخرة الحلقة الحادية عشر هلا بحَبايبنا

يوميات العم معروف الساخرة

بقلم وريشة: نضال البزم
(بِالعاميّة الأردنيّة) حلقة كل ثلاثة أيام تتناول حياة المواطن اليومية بطريقة ساخرة
بطلها "العم معروف" وزوجته "مرمر" وجاره المُقَرَب له "أبو النمر"..

الحلقة (11)
((هلا بحَبايبنا))
دخل "فرهود" ابن "العم معروف" البيت وتوجه مُسرعًا إلى غرفة نوم أبيه ودخلها دون استئذان لينقل له رسالة "أبو النمر" الشفهيه، فأثار هذا غضب "العم معروف" وزوجته "مرمر".
- العم معروف: وََلك يا هبيله.. هيك الواحد بدخل لا إحم ولا دستور؟!
- فرهود: شو يابا شايفني ببيع جرايد رأي أو دستور مثلا؟
- مرمر: وَلك يا غبي المفروض اتدق الباب مرة تانية.. عيب اتفوت بسرعة، الحمد لله لسه ما بَلشنا..
- فرهود: بشو بدك اتبلشي يُمّا؟!!
- العم معروف: انت هسع شو بدك؟! ليكون أخوك عبود عِمل مشكلة بالحارة زي العادة؟!
- فرهود: لا يابا.. عمي "أبو النمر" قلي بدو ايّاك بسرعة، الموضوع مُهم وخطير بنفس الوقت!!
- يقف العم معروف وقد ظهر عليه القلق: يا ساتر خير شو في -إن شالله- مرته "غزالة" بدها تولد وبِدو نؤخذها على المستشفى؟!
- مرمر: شو بتقول يا رجل؟ ليش هيه أرنبة حتى اتخلِف كل (40) يوم؟! روح شوف الزلمة شو بدّو!
- يخرج العم معروف: خير يا "بو النمر".. لمَستني يا زَلمِه! شو مالك؟ شو في احكي خلصني.. ليش لونك صاير أرزق؟!
- أبو النمر وهو يَرتعِب خوفًا: أمريكا بدها تضرب سوريا، وبقولوا سوريا بدها تضرب الأردن، وبدي انروح أنا وانتَ نشتري أكمِّن شوال طحين ومُعلبات وزيت حتى ما ننقطع إذا صار شي لا سمح الله.
- العم معروف بغضب: الله لا يوفقك يا "بو النمر"، وَلك انت أهبل؟! خايف تنقطع من الأكل يا ابطيني، وَلك شو يحكوو أهل سوريا المساكين؟!! شو يحكوو أهل الرمثا وإربد والمفرق إلى هُمَه جيران سوريا الحيط بالحيط؟!
- أبو النمر: يعني سوريا ما بتضربنا يا عم معروف؟!
- العم معروف: وَلك البين يُضربك.. خربت عليّ النومة بِهبلك، روح افتح دكانتك وقول يا رب.
- أبو النمر: يعني انت ما بدك تشتري مونة للحرب يا "عم معروف"؟!
- العم معروف: وَلك أي حرب يا مخَرفِن؟! شو انت مستهين بالجيش العربي الأردني المغوار ولا بحَبايبنا الأمريكان؟! أي والله إليّ بِقرِّب على أردنّا لنخلي اعِظامه تِدَقدَق..
- أبو النمر: يعني الأمريكان بدهُم يقاتلو معنا يا "عم معروف"؟
- العم معروف: وَلك هظول جماعِتنا بدهُم يوقفوو معنا إذا الجيش السوري النظامي حاول يطّاوَل علينا، مصلحة يعني.. افهمت؟
- أبو النمر: لاء كيف يعني جماعِتنا؟!
- العم معروف: أبو النمر.. روح من وجهي والله إنّي حاقد عليك قدّ الدنيا.
- أبو النمر: طيب يا "عم معروف" ما بتتوقع نزوح لأهل إربد والرمثا والمفرق على عمّان؟ ترى إذا أجو رَح يصير عِنّا نقص بالمونة!!
- العم معروف: نزوح مين يا أهبل؟!! ولمين يتركو الشمال؟!
- أبو النمر: للسورين يا "عم معروف" ما هو عدد اخوانا السوريين صار أكبر من عدد أهل الشمال كُلهم.
- العم معروف: لا حول ولا قوة إلا بالله.. "أبو النمر" بقولك روح من قدامي، والله مو طايق أشوفك بعد ما خربت علي نومة الظهر..
- أبو النمر: رايح.. رايح يا "عم معروف".. بدي أروح اشتري شوال طحين للإحتياط.. بِتحب أجبلك شوال بطريقي؟!
- العم معروف بعصبية: "أبو النمر" (اغليها وسط) وانقلع من قدامي.. — ‏مع ‏نضال البزم‏.‏

تابعونا  بكل  جديد على صفحتنا  على الفيس بوك لايك وشير

https://www.facebook.com/datingarabs


المصدر اصلاح جو