يوميات العم معروف الساخرة الحلقة الثالثة فرشة العم معروف
يوميات العم معروف الساخرة
بقلم وريشة: نضال البزم
(بِالعاميّة) حلقة كل ثلاثة أيام تتناول حياة المواطن اليومية بطريقة ساخرة
بطلها "العم معروف" وزوجته "مرمر" وجاره المقرب له "أبو النمر"..
الحلقة الثالثة
((فرشة العم معروف))
كعادته كان العم معروف يجلس في حوش داره هو وزوجته مرمر بينما ابنه "فرهود" يقوم بالتهوية عليه لشدَّة ارتفاع درجات الحرارة!! وكعادته المسائية جاء "أبو النمر" ليسهر مع صديق عمره "العم معروف" ليتبادلان الحديث حول الأوضاع الراهنة
- العم معروف يصرخ على ابنه بعد أن توقف عن التهوية عليه: وَلك ليش وَقفِت؟ هوي.. الشوب ذبحني وحاسس حالي رَح افقع!
- مرمر: حرام عليك يا "معروف" الولد تِعبْ.. أيّ شغل المروحة! بكفيه إلوو نص ساعة بهوي عليك.. انشلت إيدو يا رجل!
- ينظر لها معروف بغضب: بدك أشغل المروحة؟ ولك والله إنك بنت (.....)، يقطع عليه تكملة شتائمه جاره أبو النمر بطرقه على الباب ومنادته: يا "عم معروف".. يا "عم معروف"..
- العم معروف: وَلِه مرمر، قومي انقلعي هسع من قدامي وبس يروِّح أبو النمر غير أرفش ببطنك، لأنك بتعلّمي الاولاد يتنمردو عليّ ويعملوو انقلاب.. روح يا ولد افتح الباب لعمك أبو النمر..
يدخل أبو النمر: السلام عليكم.
العم معروف: هلا هلا "أبو النمر" شو أجيت؟
أبو النمر: لا لسه بالطريق عليك، كمان شوي بوصل.. شو مالك يا "عم معروف" شايف الشرار طالع من عيونك.. شو فيّ خير؟!!
العم معروف: تعال يا ولد هوي عليّ، ويبدأ ابنه "فرهود" المسكين بالتهوية.
أبو النمر مستغرب: شو بتعاقب بابنك؟! شغل المروحة يا رجل حرام عليك شكله هلكان؟!
العم معروف: لا ما بعاقبوو، مشغله بدل مروحة، مِش بقولوا الكهربا رح تغلى بعد العيد؟ وانا بعمل توفير للطاقة!
أبو النمر: يا "عم معروف" تعمل توفير للطاقة وتهلك ابنك وتقضي على طاقته؟! أي والله لو أنا مكانه لأرفض هذا الظلم وأعمل (ربيع عربي) عندك بالبيت وأقلبلك كل نظامك.
- ينظر له العم معروف ويغمزه ويقول له بصوت خافت: يا "ابو النمر" لا تسَّمِع الولد، أنا مو ناقصني مشاكل بالبلد.. قصدي بالبيت.. يا رجل خلينا عايشين بأمان.
- أبو النمر: طيب خليه يهوي علي شوي حتى أسكت وما أعبي راسه واخليه بعدين هو واولادك كلهم يعملوو مظاهرات ويخيموو على الدوار.. قصدي بحوش الدار..
- العم معروف: روح يا ولد هوي لعمك "أبو النمر" شوي بركي سكر ثمه وانخرس.
- أبو النمر بعد أن يبدأ "فرهود" المسكين يهوي عليه: يا سلام.. بتعرف يا "عم معروف"؟ عشان اظلك مسيطر على البيت لازم اتدبر حالك مع المُحرضين والمعارضين وترضى بطلباتهم بدون تردد زي ما اعملت معي هسع..
- العم معروف: ولك يا مصدي هيني رضيت وخليته يهويلك، خلص سكر ثمك، مع إنّو هاظا بسموه الفساد.
- أبو النمر: كيف يعني؟ أنا فاسد يعني مدتي انتهت يا "عم معروف"؟
- العم معروف: ولك هاظا إلي انته طلبته هسع يعتبر رشوة وهاظا غلط يا بو النمر!!
- أبو النمر: وليش اتوافق يا عم معروف؟ موافقتك هاذي تُعتبر فساد.
- العم معروف بغضب: طبعًا بدي أوافق حتى ما يصير عندي بالبيت (ربيع عربي) ويروح من تحت (طي...) الكرسي.. قصدي الفرشة..
- ويرمي أبو النمر نصيحته: اسمع يا عم معروف.. بدي انصحك نصيحه لوجه الله تعالى.. إذا بدك اتحافظ على فرشتك، ريح أولادك ولا تتعبهم.
0 التعليقات:
إرسال تعليق