الشاعر الطواب : الليله ليلة الخميس فيها المحاظيظ وفيها المتاعيس
فيها المحاظيظ وفيها المتاعيس
والمتعوس بيجز على نيبانه
والليله بتعدى
صبحها إما
ورد مندى أو شوك بيدمى
المهم الحياه تعدى
بحلوها ومرها ماشيه ما بتهدى
وكل خميس تنعاد الجره
إللى سعيد وإللى مقهور بالمره
وعلى دا الحال كل خميس موال
واحده بتعدد وواحده بتغنى
والدنيا على دا الحال
فيها إللى نفسه فى ولد
وفيها إللى زهقان من كتر العيال
ولا واحد راضى عن حاله
والكل بيغنى على مواله
واحد ناصب عزا وواحد عامل عريس
المهم الكل بيسلم
إللى بيعزى وإللى بيهنى
وإللى ساكت وإللى بيتكلم
دنيا غريبه كل أيامها عجيبه
ولا خميس نافع ولا سبت شافع
المهم النيه والدوافع
إللى بيدور على الخير بيلقاه
وإللى ناوى على الشر
إن شاء الله هيتعلق من قفاه
المهم البنت بكره هتبقى ست
المهم متستعجلش
تتأنى ومتلخبطش
ومش أى عريس والسلام
المهم الواد الجدع
إللى يحافظ على عرضه وميفرطش
خلى بالك من الكلام المعسول
بكره هتدورى عليه ومبيحصلش
المهم الكلام المعقول
إللى يدخل الدماغ وميطلعش
وربنا يكفينا شر المهاويس
ويجعل كل ليالينا خميس فى خميس
تابعونا بكل جديد على صفحتنا على الفيس بوك لايك وشير
0 التعليقات:
إرسال تعليق