يوميات العم معروف الساخرة
(بِالعاميّة الأردنيّة) حلقة كل ثلاثة أيام تتناول حياة المواطن اليومية بطريقة ساخرةبطلها "العم معروف" وزوجته "مرمر" وجاره المُقَرَب له "أبو النمر"..
حصري لصحيفة - إصلاح جو-
الحلقة (15)
((حكومة.. خاصة))
بينما كان "العم معروف" جالس في حوش داره ينتظر صديقه "أبو النمر" الذي لا تحلو التعليلة إلا بوجوده وقفت فجأة أمامه زوجته "مرمر" وكان يبدو عليها الغضب!
- مرمر: بنتك "أمل" كل يوم الصُبح بتغلبني! وما بِدّها اتروح على المدرسة لإنّها بتخاف من بعض (المساميس) في مدرستها لأنهم بضربوا الطالبات وبصرخوا عليهم!!
- العم معروف بِتعجُب: "مساميس"!! شو يعني "مساميس"؟!
- مرمر: "مساميس" يعني جمع مِس ولا بدك أعلمك إنتَ كمان؟!
- العم معروف: وَلك يا هبله جمع مِس (مِسّات) مو "مساميس" يقطَع حظي أنا لأني أخدت وحدة هبله مو دارسة!
- مرمر بغضب: ما شاء الله عليك اتقول إنّو إنت معك (بكروريوس)!! "معروف" أنا بدي أحل المشكلة قبل ما يجي "أبو النمر" ويروِّح من عندك بعد نصّ الليل زي عادته.. ما بدي أعمل مشكلة معك!! قولي شو نِعمل بالنسبة لابنتك "أمل" مع مِسّاتها المُرعبين؟!
- العم معروف: وَلك أنا الحياة أعطتني شهادة أكبر من (البكالوريوس) فاهمة وَله؟ وبالنسبة للمِس إليّ بتضرب الطالبات الحل بسيط.. روحي وامسحي فيها الأرض..
- مرمر: يا سلام عليك وعلى الحياة إليّ أعطتك شهادة (بكروريوس)!! هيك بنظرك بتنّحَل المشكلة؟! ليش المِس مو بنت عالم وناس؟!!
- العم معروف: طيب روحي اشكي عليها للمديرة.
- مرمر: أنا ما بدي أعمل عداوة من أولها بين بنتك "أمل" وبين والمِسّات تاعونها.
- العم معروف: طيب شو بدك نعمل حيرتيني؟!
- مرمر: بدي تنقلها على مدرسة خاصة زي بنت "أبو النمر" صاحبك، هناك بدلِلوها وبدرسوها امنيح.. مدارس الحكومة طعة وقايمة..
- العم معروف: شووووو ومِن وين بدي اجبلك قِسطها الشهري؟!! أي الباص لحاله بدو ميزانية، وكل ما رفعت الحكومة الموقرة لتر المحروقات 3 قروش برفعو سعر نقل الطالب 50 دينار.. بعدين يا "مرمر" يا حبيبتي إنتِ بتفكري المدارس الخاصة بدَّرِس الطلاب أحسن..
- مرمر: آه طبعًا لإنّو عدد طلابهم بكونو قلال مو مِتل مدارس الحكومة عدد الطلاب عندهم في بعض الصفوف بتجاوز الـ (50) طالب غير الطلاب السورين إليّ عِملو أزمه مقاعد كمان!
- العم معروف: وَلك يا تيسه المدارس الخاصة بِحطّو للطالب علامات وهمية عشان يخَلو أهله امكيفين عليه ويضل الطالب عِندهم.. يعني الأمانة عندهُم نص نص.. المدارس الحكومية ما عندها مُجاملة وبكفيش إنّو بِعفوهُم من التبرعات وحق الكُتب.. الله يديم علينا مدارسنا الحكومية ويسعد كل المعلمين والمعلمات الحلوييييين يا رب.
- مرمر: وَلك يا "معروف".. قصدي يا زوجي "معروف"، إنتَ بترضى لبنت "أبو النمر" اتكون أحسن من بنتك؟!!
- العم معروف: "أبو النمر" دخله من الدكان كويس.. والمدارس الخاصة مدارس تجارية وأنا مع المدارس الحكومية.. فاهمة؟
- مرمر: لاء المدارس الخاصة هي المدارس إليّ أنا مقتنعه فيها وبَس.
- العم معروف: طيب روحي من قدامي لإني بديت أعصِّب وما بدي يجي "أبو النمر" يلاقي الشرار طالع من عيوني!
- مرمر: بدك تُنقلها للخاصة يعني للخاصة فاهم!!
- العم معروف: أنا بقول الحكومة يعني الحكومة فاهمه!!
- واستمر الجدل بينهما حتى ارتفعت وتيرة الغضب عند "العم معروف" وما أنقذ "مرمر" من ضربة صاروخية بحذاءه الموجه إلا طرقات "أبو النمر" على الباب فقد جاء للتعليلة المسائية ولاستغابة الحكومة والناس مثل العادة.
تابعونا بكل جديد على صفحتنا على الفيس بوك لايك وشير
0 التعليقات:
إرسال تعليق