يوميات العم معروف الساخرة الحلقة الرابعة عشر السرقة الآمنة

يوميات العم معروف الساخرة

بقلم وريشة: نضال البزم
(بِالعاميّة الأردنيّة) حلقة كل ثلاثة أيام تتناول حياة المواطن اليومية بطريقة ساخرة
بطلها "العم معروف" وزوجته "مرمر" وجاره المُقَرَب له "أبو النمر"..
حصري لصحيفة - إصلاح جو-

الحلقة (14)
((السرقة الآمنة))
يدخل "العم معروف" بيته ويتفاجأ بضجة وصراخ عالي، كانت زوجته "مرمر" تضرب ابنها "فرهود" بقوة!! فأسرع ليُخلِّص المسكين من بين يديها..
- مرمر: وَلك بَقولك اعترف.. وين طَيَّرت رصيدي إليّ كان بالموبايل؟ أكيد كُنت تِحكي مع صاحِبتك الجَربة "فوفو" صَح وَلا اعترف بَقولك؟!
- العم معروف: وحدي الله يا مَرة!! شو مالك؟ ليش بتستخدمي العنف والإرهاب مع ابنك "فرهود"؟!
- مرمر: إمبارح شحنِت موبايلي بدينار، واليوم اتفاجئِت إنّو رصيدي طاير مِنّو (90) قرش، وابنك المُنحَرِف شكله سارق الموبايل وكاين يحكي مع صاحِبتو المَشطوبة "فوفو"!!
- يصرخ فرهود: ياااباااااا وعَرض خواتي ما امسِكت تلفونها، هاظا ظلم، يمكن طيَّرت رصيدها على الواتسب والتانجو مع صحبتها "أم النمر"..
- مرمر: وَلَك كمان بِتفسد.. أيّ والله لأعيد تربيتك من أول وجديد يا ابن الكلب..
- العم معروف بغضب: أنا كلب يا بنت الـ... إلا أنّ صوت (المسج) يجعله يقطع كلامه ويقول: هاتي التلفون أشوف مِن مين الرسالة إليّ جايتِك؟
- وبعد أن يفتح "العم معروف" الرسالة: وَلك هذه الرسالة من الشركة! بِقولولِك: باقي خطوتين على دخولك المُسابقة وربح إلــ (7000) دينار وسيارة موديل 2015.. السؤال: من هو الزعيم العربي الذي أرعب العالم؟ 1) صدام حسين 2) بشار الأسد 3) محمد مرسي؟ أرسل رقم الإجابة الصحيحة وكن أحد الفائزين... شِكلِك يا مَرَة مشتركة مع النصابين الحرميّة؟!
- مرمر: آه.. لا.. ما بعرف.. يمكن.. قبل يومين اجتني رسالة بتقول: جاوبي على السؤال واربحي (7000) دينار وسيارة موديل 2015 مجانًا، وبعتت عشان اربحلك سيارة بدل الكركوبة إليّ عندك..
- العم معروف: وَلك يا هبله هَظول الشركات محترفين بِضحكو عليكم وبستخفو بعقولكم.. صحيح أول رسالة بتكون مجانًا وبعدين بشلحوكُم الرصيد وانتو مو داريين عن حالكو!! وكل مرَّة بنطلوك بفكرة نصب جديدة.. مرَّة إليّ بدُّو نُكَت عشان يضحك.. أيّ هوَ إحنّا في إلنا نفس نضحك بهيك أوضاع.. ومرَّة ببعتولك أعرف حَظك وبُرجَك، إتقول إنّو عِلم الغيب صار عِندهم..
- مرمر: صحيح والله يا "معروف"، قبل فترة صاحبتي "أم النمر" اشتركت باسبوع مجانًا لنصائح طبيّة.. كانوا أول اسبوع يبعتولها رسالة باليوم وكله هبل بهبل، وبعد الاسبوع المجاني صار يوصلها باليوم (5 أو 6) رسايل نصايح ويسحبو من رصيدها بَدل الرسايل.. أيّ ابنك "فرهود" الخويثه عنده خبرة في الأمور الطبيّة أكثر منهم، والمشكلة ما كانوا يردّوا لما تتصل فيهم على المَقسَم عشان تلغي الاشتراك بالنصايح الفاشلة، غير لما جوزها "أبو النمر" راح راجعهم على فرعهم واتغلب حتى يوقفوا الاشتراك والاحتيال تبَعهُم.
- فرهود: امنيح إليّ أجيت يابا واكتشف وين طارو مصاريها ولا كان لحمتني وقضت عليّ.
- مرمر: أسفه.. أسفه يُما يا "فرهود" والله كنت أفكرك إنتَ إليّ شفطت الرصيد.. طلعت الشركة نازله سرقه فينا بطريقه آمِنة..
- فرهود: مين آمنه يُمَّا؟ بنت خالي منصور؟!
- العم معروف: وَلك يا ابني بطريقه آمنه يعني بسرقوك عينك عينك وبدون ما تُنسب إلهم قضية سرقة افهمت؟
- فرهود: لاء..
- مرمر: الله يجعلك ما افهمت قوم انقلع اشتريلنا بـ (30) قرش خبز خلينا نتعشى.
- العم معروف: شو اعملتي اليوم يا مرمر؟ شكلو إشي زاكي؟
- مرمر: آه طبعًا حتى تعرف إني طباخة ماهره، اليوم اشتركت بمطبخ "نوال" واجتني وصفة لطبخة اعملتها عشانك يا حبيبي..
- العم معروف: وَلك حَبك بُرص.. مو مخليه إشي إلا ومشتركه فيه مع وبالآخر بتتهمي "فرهود" المسكين إنّو هو إليّ بِمعَط رصيدك؟!
ملاحظة: طبعًا انسيت أقولكم إنّو "مرمر" كمان كانت برمضان مشتركة معهم الجماعة إيَّاهُم بالأحاديث النبوية عشان تدخل الجنة.. — ‏مع ‏نضال البزم‏.‏

المصدر اصلاح جو

تابعونا  بكل  جديد على صفحتنا  على الفيس بوك لايك وشير

https://www.facebook.com/datingarabs