يوميات العم معروف الساخرة الحلقة السابعة الله يرحم المرحوم

يوميات العم معروف الساخرة

بقلم وريشة: نضال البزم
(بِالعاميّة الأردنيّة) حلقة كل ثلاثة أيام تتناول حياة المواطن اليومية بطريقة ساخرة
بطلها "العم معروف" وزوجته "مرمر" وجاره المقرب له "أبو النمر"..

الحلقة السابعة

((الله يرحم المرحوم))
رنَّ (موبايل) "أبو النمر" أثناء استعداده للذهاب ليقضي سهرته المعتادة مع صديق عمره "العم معروف" في (حوش) داره..
أبو النمر: والله إنك ابن حلال يا "عم معروف"، كنت ناوي آجي أسهر عندك..
العم معروف: لا تتأخر.. في خبر مرتب يا وَلد..
أبو النمر: والله شوقتني.. جايّك زي الصاروخ يا "عم معروف".. وفعلا ذهب أبو النمر بسرعة وكأنه (سوبرمان).. ووصل بيت العم معروف بزمن قياسي، وبعد أن جلس..
أبو النمر وهو يلهث من التعب: شو الخبر المرتب يا "عم معروف"؟
العم معروف: إيدك على (20) دينار..
أبو النمر: يعني بدك أقرِضك المبلغ؟
العم معروف: لا يا أهبل، أنا كمان مثلك بدي أدفع (20) دينار، ونتغدا أنا وانت مناسف لثلاث أيام مُتتالية..
أبو النمر: لا يا "عم معروف" أنا ما بحب المطاعم..
العم معروف: ولك يا تيس مو غدا مطاعم.. غدا جارنا المرحوم "أبو اسماعيل"، بكرة دفنته..
أبو النمر: وطيب ليش أدفع (20) دينار؟
العم معروف بعصبية: لا حول ولا قوة إلا بالله.. وَلك القبر حَقو (70) دينار لأمانة عمّان، والصبّة إليّ فوق القبر مع الشاهد بـ (40) دينار، والتغسيل والكفن بـ (25) دينار وأقل شي بدك تعطي إلي بغسِّل المرحوم (5) دنانير، والصيوان والكراسي مع حبل إلضواو تقريبًا بـ (200) دينار، وبدك قهوة سادة، وبدك تمر عشان إتحلي تُم إليّ بيجو يعزو عشان يعرفو يحكو عن الشغل ويبلشو استغابة ببعض بـ (80) دينار، ولا تنسى أهم شي المناسف عشان اتغدي الناس لثلاث أيام مو أقل من (1500) دينار إذا مو أكثر، وبتعرف وضع المرحوم كان على الله، وبدنا نِعملو لمه، إفهمت "يابو النمر"؟
أبو النمر: ما هو يا "عم معروف" وقت الغدا بِنُطِّلك ناس ما بتعرف هُمَه بقربو لمين؟ أو شو صلتهم بالمرحوم؟.. بس بيجو عشان يتغدو ويفكحو..
العم معروف: طيب شو بتقترح يا حضرة "أبو النمر"؟
أبو النمر: أنا بقترج نعمل بطاقات دعوة لحضور الغدا على روح المرحوم وتتوزع بس لقرايبه واصحابه زيي وزيك يعني، ونكتب عليها ممنوع اصطحاب الأطفال.
ينظر له العم معروف بتعجب: وَلك انتَ بتعزم على حفلة عُرس؟!! بقولك عزا.. عزا يا "بو النمر"!!
أبو النمر: طيب بس مو كثير (20) دينار على الراس يا "عم معروف" ليش هو بوفيه مفتوح؟!
العم معروف: وَلك لو بِدك تعملك طبخة منسف لاولادك في البيت وليوم واحد بتكلفك أكثر من (20) دينار.. عِد على إيدك.. (2) كيلو لحمة فخد ((مثلجة)) بـ (10) دنانير، كيلو ونص رز بـ دينار ونص، لوز بدينارين، باكيت جميد سائل بـ (3) دنانير وسبعين قرش، وشوية سمنة وأكمن رغيف شِراك وهيل لضبط النكهة مع الغاز للطبخ بدك مو أقل من دينارين هيك المجموع (19) دينار تقريبًا.. وبس غدا ليوم واحد!!
أبو النمر: والله حسابك مظبوط 100% "يا عم معروف"، بس انت بتضمن ما يُقعد معنا على سدر المنسف واحد ما بستحي! يعني عدم المؤاخذه يبلش بِسحب اللحمة من قُدامك، ويحوش باللوزات وانت مقهور بتطلع ومو قادر تحكي شي؟
العم معروف: وَلك يا مفجوع: أنا حاسب حساب هظا الحكي وحكيت لأبو مصطفى وأبو خالد وأبو الوليد وأبو السعيد وأبو زكي الأهبل ونتَ وانا رح نقعد على سدر مع بعض وممنوع يُدخل بينا غريب افهمت..
يخرج أبو النمر الـ (20) دينار من جيبه بعد أن اقتنع: آه إذا هيك ماشي اتفظل يا عم معروف هي الـ (20) نيرة، بس رح أجيب معي اولادي "نمر" و "فهد"..
ورحمة الله عليك يا مرحوم. — ‏مع ‏نضال البزم‏.‏

تابعونا  بكل  جديد على صفحتنا  على الفيس بوك لايك وشير

https://www.facebook.com/datingarabs