يوميات العم معروف الساخرة
(بِالعاميّة الأردنيّة) حلقة كل ثلاثة أيام تتناول حياة المواطن اليومية بطريقة ساخرةبطلها "العم معروف" وزوجته "مرمر" وجاره المُقَرَب له "أبو النمر"..
الحلقة (13)
((الشبِّيح))
كان "العم معروف" بالحمَّام صباحًا عندما طرَقت عليه الباب زوجته "مرمر" لتُعطيه التلفون الذي لم يصمُت أبدًا..
- مرمر: "معروف" صاحبك "أبو النمر" صار رانِن عليك أكثر من (150) مرة! خوود شوف شو بِده.
- العم معروف: وَلك هو أنا فاضي.. قاعِد بفرُك بِحالي بِالليفه، سكري عليه الخط.. بس أطلع بحكي معه.
- مرمر: سكَرِت (170) مرة، بس رجع رَن.. شوف شو بدو!!
- يأخذ العم معروف الموبايل: خير؟ شو بِدك على هالصبح يا "بو النمر"؟ ما بتعرف تستنى لأخلِّص حمّامي.
- أبو النمر: وَل عليك شو بتتحَمم.. يا رجل مو وقت حمّامَك هَسه، أنا واقع بِمشكلة لحقني يُستر على عرضك..
- العم معروف: طيب تعال نشرب قهوة مع بعض وأشوف شو قصتك؟!
طبعًا يأتي "أبو النمر" بسرعة البرق ويجلس مع "العم معروف" في غرفة الضيافة.
- العم معروف: شو قصتك؟ هات تشوف..
- أبو النمر: أجتني رسالة على الفيس بوك يا "عم معروف" بهددني صاحبها إني إذا بضل أعمل لايك أو أنشر أو أعمل كومنت إنّو بدّو... ويُقاطعه العم معروف: ليش إنتَ وين بتعمل لايك؟ وشو بتنشر وبتعلّق؟!!
- أبو النمر: أي بوست بشوفه بسلخه لايك وخصوصًا المواضيع إليّ بنزلوها صديقاتي المُزز.. ومرات بنشر شويت كلام عن الأوضاع والممارسات..
- العم معروف: أي أوضاع وممارسات وَله "أبو النمر"؟!!
- أبو النمر: كلام عادي يا "عم معروف" مو مثل إليّ في بالك.. يعني مثلًا بكتب عن الأوضاع والممارسات الخاطئة إليّ بيقوم فيها الشخص أثناء ممارسته لحق العيش في الأوضاع التي نعيشها..
- العم معروف: ولو إنّي مو فاهم شي بَس كَمِل..
- أبو النمر: ولما اتكون وحدة منزله أغنيه بكتبلها بتجنن.. ولما اتنزل كلمات رومنسيه بكتبلها، أروح طخ أنا، خفة دم يعني يا "عم معروف".
- وهنا يُقاطعه العم معروف بغضب: شو بتقول أروح طخ؟!! أيّ طبعًا بِدّو يجيك رسالة تهديد.. إنتَ بتعرف إنّك هيك بتحاول إثارة الفتنة بين سطورك؟ وهاظا يُعتبر تحريض على إثارة العنف والتمرد في الفيس بوك، شو بِدك تقلبها ربيع عربي على الفيس وطخطخة.. ما بكَفيش الطخ إليّ داير حَوَلينا.. كمان إنتَ جاي بِدك اتزيد الطين بَله..
- أبو النمر: خلص بتوب يا "عم معروف" والله مو قصدي أعمل ربيع ولا خريف.. كلمة وطلعت سامحني!!
- العم معروف: وشو اسمه هاظا إليّ بعتلك رسالة التهديد؟
- أبو النمر: اسمه ((الشبِّيح)).
- العم معروف: آآآآآآه هاظا بعرفه وَلك هاظا مو مِن الحكومة يا أهبل.. هاظا واحد بتكون إنتَ علقِت عند حبيبته افهمت؟
- أبو النمر: طيب شو أعمل يا "عم معروف"؟ أبطل أعلّق عندها مثلًا؟
- العم معروف: الباب إليّ بيجيك منه الريح سَكره واستريح، ولا تحاول تعمل فيها مُصلح وطني وبدك اتحِل قضايا الفساد وتيجي بالكبار..
- أبو النمر: لا "يا عم معرف" كبار مين.. كُل عُمرها (35) سنة بس..
- العم معروف: مَنو هي هاظي؟!
- أبو النمر: المُزة إليّ بعملها كومنت ولايكات.
- العم معروف: وَلك شو دخل المُزة بِلّي بَحكيه.. قوم انقلع من قُدامي ورُح افتح دكانتك واترَزَق بدل ما انت داير ورا البنات على الفيس..
(وطبعًا لا حياة لمن تنادي "أبو النمر" اشترى تلفون سامسونج أخر موديل ومقضيها فسفسه طول النهار والليل).. — مع نضال البزم.
تابعونا بكل جديد على صفحتنا على الفيس بوك لايك وشير
صلاح
ردحذفجميل
ردحذف